HK Romance Dating創辦人Yubi黃嘉如曾經舉辦過百場Speed Dating活動，可想而知Yubi見識過唔少得意場面。今次佢會同大家分享一啲難忘經驗，等大家了解下Speed Dating行內趣聞！

首先就係衣著篇喇，男士通常都係著smart casual黎參加活動，著有領有袖嘅衫，都幾得體。講個小貼士俾大家知，原來all back頭好受女仔歡迎，通常佢地都鍾意同呢啲男士配對。女仔方面，著連身裙非常理想，配埋1.5至2寸高踭鞋就更好。好喇，係時候分享一下Yubi一個難忘經歷先，有次佢主持一場成熟人士Speed Dating活動，見到一名著保安制服嘅男士走埋黎。當時佢心諗，唔通活動有啲問題要處理？點知最後發現原來佢都係參加者，佢一收工就過黎，冇帶其他衫黎換。其實呢位男士有大學學歷，係位物業主管，但因為制服影響觀感，最後佢配對結果都唔太理想，可見衣著真係好重要呢。另外試過有Wine Tasting同Fine Dining Speed Dating活動，某啲男士著波衫黎參加，喺云云著smart casual嘅參加者中都顯得幾突兀。

其次餐桌禮儀方面，有次10男10女轉位Speed Dating食飯活動，有一個女仔好注重衛生，每食一啖食物，就抹一下嘴，結果搞到成檯都係紙巾。Yubi見到，就即刻走埋去提議幫佢清理，但參加者又唔好意思，唔想勞煩Yubi，想遲啲先叫侍應收。但侍應忙收唔切，結果成檯都係紙巾令人地感覺唔太好。另外有時參加者用刀叉太大聲，Yubi同同事一聽到咁大聲都會立即提議幫佢地換刀，只係好多時佢地都唔好唔好意思，怕麻煩到我地。不過其實大家唔使怕醜，因為我地都只係想保持大家形象。

最後係參加者篇，我地真係見過唔少律師、醫生同精算師黎參加，另外仲有其他更特別。有一次Friday Night Party Speed Dating，Yubi見到有一位藝人黎參加，名我地就唔講喇，但你見到佢一定會認得。我地都好奇點解佢會黎參加呢，原來佢話自己工時長，生活唔係真係大家想像得咁多采多姿，佢圈子都細，都難識人，所以佢黎參加都唔係奇事。另外一位令Yubi難忘嘅係位病毒學研究博士，由於工作特別，令大家同主持人都好有興趣認識佢，問咗好多得意問題。做Speed Dating行業，可以話做1年嘢，見聞就好似人地做5咗年嘢咁～

https://www.youtube.com/watch?v=Ltoiyn1Qkrw